தோத்திரந் துதி உமக்கே
பல்லவி
தோத்திர பாத்திரனே, தேவா,
தோத்திரந் துதியுமக்கே!
நேத்திரம்போல் முழு ராத்ரியுங்காத்தோய்;
நித்தியம் துதியுமக்கே!
சரணங்கள்
1. சத்துரு பயங்களின்றி,-நல்ல
நித்திரை செய்ய எமை
பத்திரமாய்ச்சீ ராட்டி உறக்கியே[1]
சுற்றிலுங் கோட்டையானாய். - தோத்திர
2. விடிந்திருள் ஏகும்வரை-கண்ணின்
விழிகளை மூடாமல்,
துடி[2] கொள் தாய்போல் படிமிசை[3] எமது
துணை எனக் காத்தவனே. - தோத்திர
3 காரிருள் அகன்றிடவே,-நல்ல
கதிரொளி திகழ்ந்திடவே,
பாரிதைப் புரட்டி உருளச்செய் தேகன
பாங்கு சீராக்கி வைத்தாய். - தோத்திர
4. இன்றைத் தினமிதிலும்-தொழில்
எந்தெந்த வகைகளிலும்
உன் திரு மறைப்படி ஒழுகிட எமக்கருள்
ஊன்றியே காத்துக்கொள்வாய். - தோத்திர
ராகம்: சங்கராபரணம்
தாளம்: ஆதி தாளம்
ஆசிரியர்: ப.ஈ. யோவான்
[1] உறங்கவைத்து
[2] பதைக்கிற
[3] பூமியின்மேல்